Wednesday, June 22, 2005

ضروريات

توني من قبل جم يوم رجعت من قطر. و طبعا اول شي سويته رديت البيت و بدلت ثيابي و استعديت لمشاهدة التلفزيون. ابطل التلفزيون الكيبل ما يشتغل شسالفة؟ قلت اخترب الحين بعد شوي بيشتغل, رحت اشوف الانترنت الا الكمبيوتر خربان. فرديت مرة ثانيه للتلفزيون و للحين ما اشتغل بطلته و صكيته جم مرة و ما في فايدة. شاسوي ؟؟!! يا ويلي ويلاه التلفزيون و الانترنت ما يشتغلون شاسوي؟؟؟؟؟؟؟؟!!!!!!!!! و على قولتهم ضربت اخماس في اسداس حسيت كاني مقطوع عن العالم. سبع ساعات من المعاناه قضيتها بلا تلفزيون و لا انترنت لين الله نزل لي مهندس الكيبل من وزارة الاعلام و صلح الجهاز و رد اشتغل مرة ثانية. حسيت على قولتهم بسعادة غامرة ما لها اول و لا تالي. المهم السالفة هاذي ممكن تكون سخيفة بس القصد منها ان الواحد شلون ما يقدر يستغني عن اشياء مثل الانترنت و التلفزيون, اشياء كانت قبل مثل الانترنت كماليات مب اساسيات. انا الصراحة حسيت مثل ما قلت مقطوع عن العالم بس الوالد و الوالدة كان اثر انقطاع الكيبل و الانترنت قليل عليهم لان على ايامهم ما كان في لا تلفزيون و لا انترنت.

خارج الموضوع : على طاري قطر صج الديرة قاعدة تشهد تطورات و الصراحة استاد خليفة اليديد شي متعوب عليه و نفس الشي المدينة الرياضية و الطبية
و الصراحة بعض النواب اللي اعترضو على دخول الوزيرة معصومة المبارك لقاعة مجلس الامة لتادية اليمين الدستورية ما لهم سالفة
و السلام عليكم و رحمة الله وبركاته

Sunday, June 12, 2005

دعاية

امس على الام بي سي شفت دعاية عجبتني و ذبحتني من الضحك. الدعاية عن شركة موبايل يديدة اسمها موبايلي او موبايلكم المهم يعني السالفة فيها موبايل. المهم ان في واحد يقول حق رفيجه اللي قاعد يمه في الاجتماع موبايلي او موبايلكم جه و مرة وحده كل اللي يم الرفيجين ما يصدقون خبر و يسمعون هالكلام الا و هم منفلتين طالعين برع قاعة الاجتماع يبون يشوفون شسالفة؟؟!! يعني اللي يشوف الدعاية بيوصل لي قناعة ان الناس في هالدعاية طالعين من فقرة و مب شايفين خير. ما لومهم و الله الناس ما تصدق ان في شركة اتصالات يديدة بتنزل الا و راحو و اشتركو فيها عقب ما شافو الظيم و الظلايم من شركتهم. و ترا هالشي مفعوله بدا مع بتلكو عندنا في البحرين . اول البشاير ان بتلكو تكرمت و عطت دقايق و مسجات ببلاش و ثاني شي انها زيدت من وقت التخفيض حق المكالمات الدولية. و ثالث شي لاحظته انا شخصيا و مادري اذا الناس لاحظوه ان فترة التنقيع على التلفون خفت يعني في استجابة اسرع ( الله يذكر ايام اول يوم كنا ننقع في التلفون بالربع و الثلث الساعة ). كل هذا صار يوم ام تي سي فودافون قررت تدش السوق بعد سنين من احتكار بتلكو حق خدمات الجوال و دخلتهم خلت بتلكو تراجع حساباتها و تسنع خدمتها انشالله دوم مب بس يوم. الخلاصة من ورا هالسالفة ان بتلكو ما تيي الا بالعين الحمره و انشالله من تخفيض لي ثاني ( الله يبلغنا انشالله بتحسين خدمات الانترنت و تخفيض الدي اس ال) امين يا رب العالمين.
و السلام عليكم ورحمة الله وبركاته

Thursday, June 09, 2005

خيشة سوالف

1. اول شي حبيت اقول للمنتخب العزيز و المنتخب الكويتي هارد لك و انشالله الجايات اكثر من الرايحات بس اهم شي يتعلمون من اللي صار هالمرة
و حبيت ابارك للمنتخب السعودي التأهل و الله يوفقهم في 2006 في المانيا

2. اليوم شفت المقابلة مع المرحوم العم عبدالعزيز حمد الصقر (معني قايل مابي اتكلم في السياسة) بس بالفعل تمنيت لو يكون قدوة حق بعض السياسيين اللي ما همنهم الا نفسهم كان مخلص حق ديرته و يبدي بلاده على مصالحه الشخصية رحمة الله عليك يا عم بو حمد . الشي الوحيد اللي تقدر تسويه الكويت انها تتذكر الراحل و تحاول بعد انها تسجل انجازاته و انجازات الرعيل الاول اللي كانو معاه و اللي ساهموا في نهضة الكويت مثلا عن طريق كتاب يحوي معلومات عن كل الشخصيات اللي عاصرت ذيج الحقبة او برامج وثائقية تتكلم عن هالمرحلة المهمة. المهم انه يكون في توثيق حق هالمرحلة و شخصيات هالمرحلة المهمة احسن من ما ننساهم و ننسى اعمالهم و تبقى هالاشياء مقطوطة في رفوف الارشيف.

3. عجبني مقال قبل فترة لفؤاد الهاشم يقول فيه ان عنده جهل في التكنولوجيا و الكمبيوتر. و انا بعد نفس الشي و توني اكتشفت هالشي قبل كم يوم قريت اعلان في الجريدة ان فودافون عندهم وايرلس انترنت. يعني بالمختصر المفيد انترنت من غير وايرات و لا اسلاك و لا هم يحزنون. كل اللي عليك انك يكون عندك لاب توب و تشتري البطاقة من عندهم و الباقي هم يسونه لك. و توني اعرف ان بعض اللابتوبات فيها بلو توث ! تصدقون عاد :)

Monday, June 06, 2005

ثقالة دم

المصيبة ان في بعض المذيعات ثقيلات دم و اسلوبهم متكلف زيادة عن اللزوم و الواحد تلوع جبده اذا شاف برامجهم. عندنا مثلا الاخت هالة سرحان اللي حاب يضيع وقته خله يشوف برامجها على روتانا و بيحس بالكلام اللي اقوله. المقدمة الطويلة العريضة اللي تقولها في اول البرنامج تخلي المشاهد يحس ان واحد مثل محمد عبده و لا فيروز راح يطل عليهم, و في النهاية ايي واحد حالته حاله او مغنية رايحة فيها ما نزل لها الا البومين و مسويين كل هالضجة.
مثال ثاني الاخت نجاح المساعيد و في برنامجها دانات اللي تبثه فضائية ابوظبي. قبل كم يوم كنت افرفر في هالقنوات و مرة وحدة وقفت على قناة ابوظبي. اشوف سيارة رولز رويس الجديدة قاعدة تمشي بالعدال و مرة وحدة توقف و انا عبالي ان السالفة فيها افتتاح فيلم يديد و لا مهرجان. و مرة وحدة تطلع نجاح المساعيد من السيارة ولابسة لها ثياب اللي يقول رايحه الاخت سهرة. قلت في نفسي خلني اكمل و اشوف شسالفة . و بدت الاخت تتكلم عن فندق قصر الامارات ( اللي بالفعل و الصراحة تحفة فنية جان زين لو عندنا مثله) و مرة وحدة قلبت السالفة لمقابلة مع شاعر. هني كانت الصدمة سيارة رولز رويس و فستان حق سهرات مب مقابلات و فندق طويل عريض كله علشنا مقابلة شعرية. ليش ما في ستديو؟؟!! شعليه كل هذا ؟ و يقولون عنا ان نحب المظاهر و الكشخة. كان من الممكن مثلا ان تسوي المقابلة في ستديو و بعيد عن هالمظاهر هاذي كلها. يعني شوفو الفرق بين برنامج بروين حبيب في دبي و بين برنامج نجاح المساعيد في ابوظبي فرق السما و الارض.
ما بط جبدي الا الرولز رويس شحقه؟! و انتو شرايكم؟
و السلام عليكم ورحمة الله وبركاته

Saturday, June 04, 2005

و الله فراغة

سالفة غريبة عجيبة
عاد انا كنت رايح مع واحد من الربع المجمع و كنت على غير العادة لابس بنطلون و فانيله كنوع من التغيير. دشيت محل و اذا اسمع وحده تقول حق واحد بصوت واطي , و كانو يطالعوني شوفه لابس فانيله موديل 2003, انا لحظتها وقف شعر راسي شدراها انها موديل 2003؟ رجعت البيت و طالعت نفسي في المنظرة و اشوف تحت الفانيلة مكتوب 03 . و بعد شوية استفسارات من اهل الخبرة اللي يعرفون في هالامور اكثر مني قالو لي ان الاخ جورجيو بن ارماني يكتب على بعض فنايله السنة اللي نزلها في السوق. ما قصر و الله الحبيب و خلاني طماشة بين خلق الله ( اللي يقول عاد افتكر ) و بعدها صادتني نوبة هلع و قلت في قلبي لازم انزل السوق و اخم الاولي و التالي بس علشان اواكب الموضة.. اتغشمر. المهم من ورا السالفة اتضح لي شي واحد اللي هو اني اتم مع ثوبي و كبوسي ابرك لي من لبس البنطلون و الفانيلة خصوصا اني رشيق زيادة عن اللزوم :p

هارد لك

:( هارد لك للمنتخب البحريني و الكويتي و انشالله الجايات اكثر من الرايحات
انا بس اقول في قلبي الله يصبر الجماهير اللي راحت الاستاد الوطني من عز القايلة لي وقت المباراة علشان يشجعون المنتخب بس بعد شنسوي

و الله يستر بس من مباراة البحرين ضد ايران

Friday, June 03, 2005

خيشة مباريات

اليوم عندنا خيشة مباريات لتصفيات كاس العالم
1. البحرين ضد اليابان و نتمنى طبعا الفوز للاحمر
2. الكويت ضد السعودية علشان اكون محايد اتمنى الفوز للفريق اللي يستاهل
3. اوزبكستان ضد كوريا الجنوبية عاد هني ما فتكر من اللي يفوز او يخسر

و بالمناسبة حبيت ابارك للاخوة الكويتيين نتايج الانتخابات النيابية تصدقون عاد انا كنت متوقع الفوز لثنين مرشحين لاني كنت اشوف صورهم بصورة يومية في الوطن في لندن و قريت مقال بعد يقول ان الصوت ينشرى ب 100-500 دينار و الله خوش المهم ان الامتحان الكبير ياي بعد سنتين فانتخابات مجلس الامة
و السلام عليكم

Thursday, June 02, 2005

طيران الخليج

طيران الخليج مب بس شركة طيرا ن عادية هالشركة لها معزة خاصة بالقلب خصوصا صار لي سنين و انا اسافر على طياراتها و اتنعم بخدمة الخمس نجوم (مالت عليهم) اللي صج بط جبدي و خلاني اكتب هالبلوق هو الدعايات اللي يحطونها عن الكراسي اليديدة اللي على الاولى و رجال الاعمال. يعني ما صارت اللي يقول هم اول ناس. الصراحة ما عرف من وين ابتدي بس هاذي اهم الاشياء
1. صح النوم يا طيران الخليج غيركم سبقكم و حط هالنوع من الكراسي من زمان لكن مقيولة لازم طيران الخليج اخر الناس شوفو القطرية و الاماراتية شمسويين بعدين تعالو تكلمو
2. فكرة الطباخين حدها سخيفة لان الاكل بوجودهم للحين ماصخ و مب حلو و اللي مثلي يركبون على السياحية اللي يعينهم على الاكل اللي ما يتغير اللي بالعافية. صار لي شهور و انا رايح و راد من بحرين لي لندن و شوفة عينكم الاكل مثل ما هو ما تغير لكن شنقول
3. المصيبة العودة في الكراسي المريحة على السياحية و وسائل الترفيه الممتعة. في شركات الطيرا ن الثانية صار شي طبيعي ان لكل مسافر شاشته الخاصة الا في طيران الخليج. انت و حظك في طيارات مزودة بهالشي و في طيارات ثانية تيي لندن و ما فيها الا هالتلفزيون العود اللي يكسر الرقبة و يعمي العين لما تشوف البرامج الممتعة
4. ملاحظة رابعة او نصيحة رحمونا و رحمو خلق الله و زيدو الحمامات اللي في السياحية و الله حرام
طيران الخليج صار لها اكثر من خمسين و هي تطير لكن اللي يركب على طياراتها يقول توها داشة التسعينات مب الالفية. حفظ الله شركتنا العتيدة للمسافرين الخليجيين و العرب و المسلمين و الباقي امين يا رب العالمين
و السلام عليكم و رحمة الله وبركاته

Wednesday, June 01, 2005

انحلت المشكلة

الحمد لله اخيرا انحلت المشكلة و صرت اقدر اشوف بلوقي العزيز بعد ما نزلت برنامج يسمح يطلع البلوق, الظاهر الاكسبلورر و النت سكيب ما يطلعون البلوق مادري ليش نحاسة.
المهم في البداية صار لي في عالم البلوقات تقريبا اربع شهور و كسور و في البداية حسيت ان الفكرة سخيفة و ما تسوى, و ما تسوى عوار الراس و الدندرة. بس لاحظت نفسي اكثر من روحاتي حق البلوقات و الصراحة شدتني الفكرة من بعد فترة خصوصا اني صرت اتردد على بعض البلوقات بصورة يومية مثل بلوق بو مريوم اللي شرفني طبعا باول ملاحظة على البلوق. ففي النهاية قررت اني اخوض تجربة البلوققنج و عسى الله يوفقني و تنال المواضيع على رضا القراء. الصراحة البلوق بس سوالف عادية عن مواقف تصير في الحياة اليومية مالي خلق اتكلم في السياسة (يمكن امر على بعض الامور السياسية مرور الكرام ) بس الصراحة البلوق بصورة عامة عن سوالف عادية.

اختبار

البلوج مب راضي يشتغل :( على كمبيوتري

بيان رقم واحد

السلام عليكم ورحمة الله وبركاته
اليوم يوم تاريخي بالنسبة لي اول مرة اسوي لي بلوج و انشالله يعجبكم