تحلطم في تحلطم

السلام عليكم ورحمة الله وبركاته
اليوم البوست راح يكون تحلطم في تحلطم..... الجو العام كئيب و شغل ما يخلص هالبحوث مثل الهم قاعدين على جبدي.... و جو لندن هم بعد ما يشجع هالجم يوم قاعدة تمطر و المطر في لندن حوسة .... بس الحمد لله على كل حال
جم شغلة باطة جبدي

في البحرين:
معني قايل ما بتكلم في السياسة بس ليش كل اسبوعين تطق هوشة في وزارة الصحة بين الدكاترة و الوزارة و الحين على سالفة الطوارئ ... مسكينة هالوزيرة صاكينها بعين الله يستر و انشالله الامور تنحل بسرعة

و خلونا في الهوشات ليش كل اسبوعين بعد تطق هوشة بين وزارة الشؤون و الاتحاد النسائي .... القضاء اصدر حكمه باشهار الاتحاد و الوزارة مناحسة و بتستأنف الحكم .... زين ليش؟ شهروا الاتحاد و فكونا او اذا شافت الوزارة ان الاتحاد سوه اي شي غلط تفوم باتباع الاجراءت القانونية.... انا اقول بس انشالله الامور تنحل بسرعة

ليش في ستين الف عمارة صغيرة في فريج من فرجان المحرق.... اللي يشوف الفرجان يقول منهاتن و لا نايتس بريج و لا الماي فير الف عمارة على شارع صغير..... الواحد ما يحصل له محل يصفط سيارته و السبة هالعماير الصغير اللي تارسة الفرجان وين المجلس البلدي ... طبعا ما يحتاج اقول المجلس البلدي في المحرق نايم في العسل و في الهوشات اللي ما لها اول من تالي :(

ليش في ستين الف مجمع على شارع عمومي واحد؟ زحمة و الواحد ما يحصل له موقف
ليش الناس تعامل شوارع الفرجان الداخلية على اساس انها شوارع عمومية تلقون ستين الف سيارة مندعسة في شارع متر ب متر
افففففففففففف ليش؟

ليش الناس في شوارع الفرجان تتعمد توقف سيارتها في وسط الشارع..... يعني السالفة سالفة نحاس و معاند
في لندن:

ليش كل يوم تكون في تاخيرات على اكثر من خط من خطوط الاندر جروند؟

ليش كل سنة يرفعون اسعار التذاكر حسبي الله عليهم و ما يطورون خدماتهم فرق السما و الارض بين الاندرجروند اللي في لندن و اللي في سنغافورة .... في لندن بعض المحطات اللي في وسط العاصمة تخرع مثل ساوث كنزنغتون و سلون سكوير و كنغز كروس سنت بنكرس
..........

خلصت من التحلطم.... بس رسالة للاخوة و الاخوات متابعي و مرتادي البلوق ودي اسمع رايكم و انتقاداتكم بخصوص البلوق اي شي في خاطركم قولوه .... ودي اطور البلوق و استفيد منه اكثر و استفيد من اراكم .... شاكر لكم مرة ثانية مروركم

و السلام عليكم ورحمة الله وبركاته