و اخيـــــــرا

و اخيرا الحمد لله تم تحديث البلوق :)

اول شي ادري انها متاخرة بس حبيت ابارك لكل بحريني و كل من تعز عليه ديرتي البحرين بمناسبة العيد الوطني و عيد الجلوس ينعاد على البحرين بالخير و التطور انشالله

و ثاني شي حبيت اشكر كل من سأل عني في فترة غيابي و كل من علق على البوست الاخير.... سامحوني بس البحوث طلعو عيوني و ذبحوني فما قدرت اكتب اي بوست يديد طول هالفترة

موضوع كنت ابي اكتب عنه و كتبت عنه من فترة (اعتقد في شهر ستة) هو معاناة السفر على الدرجة السياحية في طيران الخليج... الحمد لله هالمرة في تطور شوي عن اخر مرة
1. اول شي الحمد لله صار لكل كرسي تلفزيون خاص بدل ما تنكسر رقبتنا و احنا نطالع التلفزيون اللي في اول المقضورة... يوم رديت من لندن في شهر خمسة السياحية ماكان فيها الا التلفزيون الكبير اللي في اول الكبينة و بعدين في هالشاشات الصغيرة اللي الوانها تعمي العين
2. بالنسبة للحمامات و انتو بكرامة كان في زيادة حمام واحد مقارنة باخر مرة(او يمكن انا غلطان) بس بعد حق 250 مسافر خمس حمامات اعتقد انها شوي قليلة... الحرة و القهر ان درجة رجال الاعمال لهم حمامين حق ست و ثلاثين مسافر :(
3. بالنسبة للاكل ... ما يحتاج بعد اقول و الله لو مب اليوع جان ما كليت في الطيارة و صبرت نفسي لين اوصل البحرين بس بعد شاسوي للضرورة احكامها مثل ما يقولون
4. بالنسبة لي انا صج انبطت جبدي يوم ان الموظفة تقول لي ان المقعد اللي حاجزه في احد ثاني ماخذه .... انا مب محتر الا على الروحة لمكتبهم الكحيان اللي في همرسمث طقيت الدرب لي هناك بس علشان احجز المقعد و اطلع ورقة الحجز.... الله يرحم ايام اول يوم كان مكتب طيران الخليج في جرين بارك كان الموقع بالفعل استراتيجي و مهم.

عسى بس ما طولت عليكم بتحلطمي؟
و السلام عليكم ورحمة الله وبركاته