الاستعدادات

اليوم كلمت الوالدة و باركت لي بالعيد الله يعوده علينا و على الملسمين جميع بالخير و اليمن و المسرات
و كلمت عيال خالتي ابارك لهم مقدما بالعيد و باجر بعد بارد اكلمهم (يا بخت بتلكو و الله يكون في عون الوالد لين توصله الفاتورة ) الصراحة ولهت على جو الاستعدادات قبل العيد

كالعادة بنات الخالة و العمات في ركضة دايمة ورا المجمعات بالذات اللي عندها جامعة في اخر لحظة يبون يشترون بدلة و لا وحدة من قبلها شرتها و معاها الجوتي و الشنطة و الاشياء الثانية طبعا بعد ما تبي ولا وحدة يكون عندهنا نفس الموديل و كل هذا يبونه يصير في ساعة او ساعتين ثلاث ان كثر لانهم ما يبون يفوتون المسلسل او الفطور. و الله يكون في عون اللي رايح معاهم بتطلع عينه و هو يلاحقهم من محل لي ثاني. هذا كله في كوم و تفصيل العباية في كوم, و خصوصا اذا الخياط ناحس و قرر ان يبرز العباية يوم قبل العيد تبتدي رحلة العذاب الثانية لتدوير خياط يفصل عباية على الكيف و المزاج مع الاصرار ان ما في لا بنت مفصلة نفس الموديل و يبون العباية تكون بارزة اسبوع قبل العيد معن ما باقي على العيد الا اسبوعين :(

اما بالنسبة للصبيان فالحال نفسه بس اخف بكثير. لازم كل سنة تصير حرب داحس و الغبراء مع الخياط خصوصا اذا الحبيب بعد ناحس و قرر انه يجهز الثوب ليلة العيد معن قايل ان الثوب بيكون بارز اسبوع قبل . اما اذا الواحد كان بايع نفسه او ما عنده شي يسويه فنصيحة يتجه الى الحلاق. فقصة الشعر مع النطرة في الاوقات العادية ممكن تاخذ لها بالكثير نص ساعة لكن ليلة العيد الحلاق يتم مبطل لي الساعة ثلاث الصبح (يعني اللي يطلعه في سنة يطلعه في يوم) و في بعضهم يقول لك لازم تحجز موعد:(

اما على الصعيد المنزلي يومين قبل العيد تعلن الوالدة حالة الاستنفار القصوى بعد ان اعلنت حالة الاستنفار العادية قبل اسبوع. كل الشغالات يتوجهون للمطبخ في بيت يدتي مسلحين بالسجاجين و الملاليس لتجهيز الحلوى و بلعة العيد و يا ويل كل من تسول له نفسه ان يروح ياكل من الحلاوة بالخش فالاحكام العسكرية بانتظاره هالمرة من الشغالة . و الاشغال تبلغ ذروتها في صبحية العيد فاذا عندك غترة ناسي تكويها لتفكر تعطيها الشغالة او الكواي كوها بنفسك ! .. و عيدكم مبارك

تابعونا بعد ساعات لاخر التفاصيل العيد في لندن