Friday, November 04, 2005

عيدكم مبـــــــــــــــــــــــــــــارك

عيدكم مبارك و عساكم من عواده مثل ما قلت لكم راح انشالله اوافيكم بتفاصيل العيد في لندن و انشالله هالبوست يكون خفيف عليكم

اول شي صحيت الساعة تسع على صوت التلفون الوالدة و الوالد يعيدون علي و الوالدة تحرص علي اني اقوم من الرقاد و ما اكمل نومتي و اهم شي اني اتحكم في مستويات البلع و الاكل بعدها اتصلت لبقية الاهل الخالات و الخوال و العمام و العمات و عيالهم و عايدتهم و بخت شركة الاتصالات و الله يعين الوالد لين توصله الفاتورة

طبعا اليوم هطلت امطار الخير على العاصمة البريطانية لندن و ضواحيها و لكنها لم تكن خير على مظلتي اللي احيلت للتقاعد النهائي. طبعا الوجهة كانت اول شي لفريج نايتس بريج العامر و اليوم ماشاء الله كان الفريج عامر بالعرب و المسلمين بمناسبة عيد الفطر اعاده الله علينا بالخير و اليمن و البركات. توجهت الى متاجر هارودز و هارفي نيكلز العامرة للتطمش و لرؤية اخر صيحات الموضة (عاد اللي يقول افهم في هالاشياء) شريت ما تيسر من الاغراض و بعدين لاقيت الربع و رحنا مثل بقية الخليجيين و العرب الى مطعم البيزاريا اللي كان مزحوم و اضطرينا ان ننطر ربع ساعة علشان نحصل على كرسي حشينا و عقرنا و هذرنا و بعدها توجهنا الى شارع ادجور بالفعل هناك مظاهر العيد كانت بادية اكثر الناس تعايد على بعضها البعض حتى راعي الجرايد عايدني . مشينا و تفرفرنا و خلص العيد..

اما على الصعيد الاخر فقد كشف الجهاز المركزي للحش و العقرة ارتفاعا ملحوظا في نسب العقرة و الحش و حسب راي الخبراء بان هذا الشيء عادي و معناه ان الامور تسير على ما يرام و ان كل راجع لطبيعته

بالنهاية احب اعايد الجميع و اقول لهم عيدكم مبارك و عساكم من عواده

8 Comments:

Blogger متفرغ said...

احمد فوزي:
شكرا على الزيارة

رياضاوي:
و انت بخير و صحة و سلامة من احد الاسباب اللي خلتني اختار لندن للدراسة هي كثرة المسلمين و الخليجيين و هالشي ما بيخليني احس بالغربة وايد

6:27 AM  
Blogger Unknown said...

عيدك مبارك
والله يرجعك لميمتك بالسلامه

مع اني ودي اجرب الغربه واشوف شعور المغترب
وكيف يعتمد على نفسه

بس السكن بدوله مو دولتك فكره تخوف شوي

^^ اصلا مهب حاصلي حتى لو بغيت
حامض على بوزي على قولتهم :P

3:41 PM  
Blogger متفرغ said...

se3loah
الله يسلمج ادري فكرة الدراسة فالخارج خرعتني بالبداية بس بتشجيع الوالدين قدرت اتكيف بس اعترف واجهات صعوبات بس الحمد لله على كل حال :)

kuwaity ra7al
و انت بخير و صحة و سلامة صج ما في شي احلى من اللمة تنسيك الاحساس بالغربة و على طاري المظلة تم و بحمد الله ادخال مظلة يديدة في الخدمة

3:45 AM  
Blogger Mother Courage said...

عيدك مبارك ولو انها متأخره ,,, غريبه انك فضلت بريطانيا على امريكا ,,, مع ان الانجليز "حامضين" مثل مايقولون والامريكان "حليوين"

3:46 AM  
Blogger متفرغ said...

mother courage:
عساج من عوداه تبين الصج كنت حاط هالشي في راسي يوم كنت اختار الجامعات بس من احد الاسباب اللي خلتني اختار لندن قربها للبحرين مقارنة بامريكا و العطل الطويلة و اهم شي اني متعود على الديرة

4:33 AM  
Blogger الاء سعود المجيبل said...

كل عام وانت بخير مع انها متأخرة ..!

والله يوفقك ان شاء الله وترد سالم لاهلك..:)

11:07 PM  
Blogger متفرغ said...

q8tya:
و انتي بخير و صحة و سلامة و شاكر لج مرورج بالبلوق :)

4:31 AM  
Blogger متفرغ said...

bin majd:
و انت بخير و صحة و سلامة و مشكور على المرور :)

5:11 AM  

Post a Comment

<< Home