منــــــــــــــــــــــــــــــــوعات

السلام عليكم ورحمة الله وبركاته

شلونكم شخباركم عساكم بخير طيبين ؟

اليوم عندي لكم شوية سويليفات قلت احطها في المدونة لان دخلنا في شهر 12 الله يجعله شهر خير و بركات عليكم و تختمون هالسنة و انتو بصحة و سلامة
- - - - - - - - - - - - - - - -

اللي يقدر يصوت ..... صوتوا لمدونة كله مطقوق لجائزة افضل مدون كويتي لانه يتساهل :)

- - - - - - - - - - - - - - - -

شهر 12 شهر حلو ليش ؟ لانه يصادف فيه عيد البحرين الوطني من 16-17 ديسمبر و هالسنة انشالله عيد الاضحى المبارك راح يصادف اخر الشهر فكل هالمناسبات الحلوة مجتمعة في شهر واحد

- - - - - - - -- - - - - - - -

على طاري الانتخابات بس بصراحة ودي اقول شي واحد بس ..... و الله حسافة على عدم وصول الدكتورة منيرة فخرو و الله لو انها كانت مترشحة عن دائرتي جان عطيتها صوتي بس بعد شنسوي تأتي الرياح بما لا تشتهيه السفن .... و تبقى للدكتورة منيرة مكانتها في قلوب اهل البحرين و انشالله الجايات اكثر من الرايحات ..... و اللي يحزن اكثر هو انتشار الشائعات و الكلام الفاضي اللي ماله معنى عن بعض المرشحين و التشكيك فيهم و تحريض الناس ضدهم ..... و بصراحة اقولها بعض النواب ما كنت اتمنى اني اجوفهم في المجلس -و لتسألوني من- و على فكرة ما عندي اي انتماء سياسي لاني بعلماني و لا ليبرالي و لا بطيخي و لا من الاخوان المسلمين ..... بحريني و بس انتخب اللي يخدم ديرتي ..... و بصراحة ماحب السياسة بس احس انها شر لا بد منه .... و احاول اتحاشى كثر ماقدر التكلم في السياسة لاني بالنهاية اطلع من ورا الحوار بعوار راس حتى اقوى بنادول ما يقدر يخففه

- - - - - - - - - - - - - - - -

الدوحة يوم 1-12 صج كانت عروس و اقل شي اقدر اقوله عن حفل الافتتاح انه روعة و بصراحة فاق توقعاتي .... ممكن شهادتي تكون شوي مجروحة بس اللي يعرفني يعرف شكثر اعز قطر و اهلها لاني اعتبر هالديرة ديرتي الثانية و معزتها و غلاتها من معزة و غلاة البحرين .... عشت و تربيت في هالبلاد الطيبة ... الله يحفظها من كل شر

كله يهون هالتكسيرات و التعديلات اللي ما لها اول من تالي في هالشوارع مثل الدائري الرابع اللي في هالاربع السنين اللي فاتوا و لا فوق الخمس مرات انصك و شارع المطار و الدائري الخامس و دوارات مدماك و الجوازات و الشوارع اللي يم منطقة العمارات و اللستة تطول ...... كله يهون علشان الاسياد

- - - - - - - - - - - - - - - - -

الاجواء في لندن شوي بدت تبرد بس و في البحرين يقولون انها مطرت اخيرا نقدر نلبس هالثياب الشتوية الثقيلة اللي مكودة في الكبت :) هالجم يوم اللي فاتوا لاعت جبدي من استعمال السنترل لاين تاخيرات مالها اول من تالي و غير زحمة القطارات اللي تطفش الواحد

- - - - - - - - - - - - - - - - -

الشغل بدا يتكود بس ياشين الكسل ..... مابي اسوي شي و ابي في نفس الوقت اغمض و افتح و القى كل البحوث كاملة و خالصة و مفهرسة و علامات زينة ...... ادري اتشرط وايد :)

- - - - - - - - - - - - - - - - -

و السلام عليكم و رحمة الله وبركاته

رســـــــــــــــــــــــالة

السلام عليكم ورحمة الله وبركاته

المهم شلونكم و شخباركم .... شكله البوست الاخير لوع جبدكم .... المهم البوست اليوم راح يكون شوي سياسي مثل ما انتو عارفين ان باجر الانتخابات و عندي جم شي ودي اقوله معني احب احتفظ بارائي السياسية لنفسي بس فخاطري كلام او رسالة اوجهها للناخبين اللي بيدلون باصواتهم باجر
- - - - - - - - - - - - - - -

اهل البحرين الكرام
البحرين امانة برقبتكم و لا تفرطون فيها و باجر يوم مهم بالنسبة للجيمع في منكم من انتظر هاليوم من فترة طويلة علشان يدلي بصوته و يقول كلمته .... لما باجر انشالله تدلون بصوتكم فكروا فالبحرين و مستقبلها و مستقبل اجيالها القادمة لان صوتكم امانة فلازم يكون اختياركم صحيح لان النواب راح يتخذون قرارات مصيرية و مهمة تمس الاجيال الحالية و القادمة فلازم اللي يدش المجلس يكون على قد المسؤولية و قادر على القيام بواجباته على اكمل وجه .... و هاذي يعتمد على الناخبين لانهم المسؤولين عن انتخاب نوابهم

- - - - - - - - - - - - - -

اهل البحرين الكرام

انتخبوا من بيخدم البحرين بعيونه و من مستعد يبدي مصلحة الديرة على مصالحه الشخصية .... انتخبوا من اللي بيراكض و بيدافع عن مصالحكم مب اللي بيراكض ورا المعاش التقاعدي و الامتيازات . لا تغركم هالعيوش و المجابيس و المقرات و الخيم و الانتخابية و الحملات الانتخابية و الكلام اللي يصفه البعض .... المحك و الامتحان الحقيقي تحت سقف المجلس النيابي مب في المقرات و الخيام .... من يدري اليوم المرشح مسوي فيها اصلاحي و لما يدش المجلس يلحس كلامه و ينسى وعوده ايام الانتخابات

- - - - - - - - - - - - - -

اهل البحرين الغيارى
لا تشتتكم الطائفية و اتحدوا و كونوا مثل ما كانوا اجدادنا و خيرة رجال البحرين يوم اتحدوا و اسسوا هيئة الاتحاد الوطني في خمسينات القرن الماضي و نسوا وراهم التقسيمات الطائفية و وقفوا كلهم و تعاضدوا علشان يطالبون باصلاحات سياسية اكثر و مشاركة شعبية اوسع .... ما انجرفوا ورا شعارات الطائفية لان البحرين وطن يحتضن الجميع و ما يفرق بين احد

- - - - - - - - - - - - - -

اهل البحرين الطيبين
المرأة البحرينية قدها و قدود و رفعت اسم البحرين فوق فهي الوزيرة و السفيرة والقاضية و يكفينا فخر بأن اصبحنا اول دولة في الخليج توصل فيه المرأة الى المجلس فاتمنى وصول اكثر من مرأة الى المجلس النيابي لانها على قد المسؤولية و واعية و قادرة على خدمة بلادها مثل الرجل

- - - - - - - - - - -- --

و انشالله باجر يكون يوم خير على البحرين و على اهلها ..... و الله يحفظ ديرتي و اهلها من كل شر

و السلام عليكم و رحمة الله وبركاته

حملة وطنية

السلام عليكم ورحمة الله وبركاته

شلونكم شخباركم انشالله بخير طيبين ؟

طبعا اليوم عندي موضوع كنت ابي اكتب عنه من فترة بس كنت متردد بس تشجعت عقب ما قريت بوستين الاول لموغلي في مدونة كله مطقوق * و اليوست الثاني في مدونة تيبل ماونتن**

موضوع اليوم هو الحملة الوطنية لمكافحة الريحة الخايسة و الصنان .... ادري لوعت جبدكم بس استحملو ماعليه..... المهم اللي خلاني اكتب هالموضوع بجانب السبب اللي ذكرته فوق هو الفضفضة و البوح بما يجول في خاطري -من وين مطلعها مادري- و لاسداء بعض النصائح و لزيادة الوعي

طبعا تخيل و انت قاعد من النوم و تتجهز علشان تبتدي يومك ..... ودك تشم روائح تفتح النفس مثل ريحة القهوة او الفواكه و بالذات البرتقال او اليح ..... بس شراح يكون احساسك لما تسفتح يومك و انت مثلا تستعمل المواصلات العامة بشم ريحة بصل او ثوم و او ريحة كائن حي خايس صار له شهور ما تسبح او ما تعطر؟ راح ينعفس يومك و هو للحين ما ابتدى.

تخيلو معاي نفسكم في قطارات الانفاق وقت ساعة الذروة يعني من الساعة اربع و طالع حسب توقيت مدينة لندن و ضواحيها و القطار مزحوم و الاوادم متكودين داخل و انت واحد منهم و جدامك اكثر من وقفة علشان توصل وجهتك النهاية و القطار صغير و التهوية ما منها فايدة و اللي واقف يمك ريحته تسد النفس و تعمي العيون و تسد الخشوم شراح يكون احساسك\ج؟

عندي بعض النصايح لعل و عسى تساعد على السيطرة على الريحة الخايسة:
1. السبوح السبوح السبوح اكرررها ثلاث مرات نظرا لاهمية السبوح لازالة الريحة الخايسة و يرجى الحرص على استعمال الصابون في عملية السبوح لما للصابون من فوائد منها تطهير الجسم و القضاء على مسببات الريحة الغير مرغوب فيها . و ايضا ينصح باستعمال الديودرنت بعد السبوح لضمان اسمترار الرائحة الحلوة طوال اليوم
2. يرجى الامتناع او التخفيف بنسبة كبيرة بالذات في الصبح او اذا كنت متواجد في مكان مزحوم من المأكولات ذات الرائحة القوية و الفتاكة اللي تعمي العيون و تسد الخشوم مثل البصل و الثوم (و اشدد على الثوم بالذات لان ريحته قوية و تدوم ما ينفع معاه حتى الكلوركس) و اذا اضطريت انك تاكل هالاشياء يرجى عدم مضغ العلكة لانك بدل ما تكلحها قاعد تعميها . الحل الوحيد انك تغسل اسنانك و تتمضمض بديتول او كلوركس يمكن من يدري تخف الريحة
3. يرجى الاكثار من شرب الماي و استعمال غسول الفم للقضاء على رائحة الفم الكريهة
4. اذا كنت صايم خاف الله و لا تتنفس او تتكلم و انت قريب من الشخص اترك مسافة كافية علشان ما تذبح اللي قاعد تكلمه بريحة حلجك الخايسة
مع تحيات قسم التوعية و التثقيف

و اللي عنده اي اقتراحات ثانية لا يبخل علينا

و السلام عليكم ورحمة الله وبركاته

*kilama6goog.blogspot.com
**viser-haut.blogspot.com

قصة و سؤال

السلام عليكم ورحمة الله وبركاته

شلونكم و شخباركم انشالله بخير طيبين؟

المهم في الصيف قريت الجزء الثاني من قصة المرحوم عبدالله المعجل الغربة الثانية اللي قامت باكمالها سعاد المعجل لان الكاتب توفي الله يرحمه فما مداه انه يكمل القصة. بصراحة قريت الرواية بجزئينها الاول و الثاني و نصيحتي لزوار المدونة الكرام انهم يقرون الرواية كاملة لانها راح تنال انشالله على رضاهم و استحسانهم. و برايي ان سعاد المعجل كانت موفقة باكمال القصة حسيت ان للحين كان في تسلسل بين افكارها و افكار الكاتب .

احد المواضيع اللي تناولتها الرواية بالذات في جزءها الثاني هي الصدمة الحضارية اللي يتعرض لها الطلبة اللي يدرسون في الخارج, و انعكاسها على الشخص نفسه. في بعض الطلبة تمردوا على الواقع اللي كانو عايشين فيه و تطبعوا بطبايع اهل البلد و نلقاهم متغيرين من الداخل و الخارج 180 درجة, حتى انه يتنصل من عاداته و تقاليده و يعتبرها افكار قديمة و بالية و عفا عليها الزمن و لازم الواحد يتغير علشان يواكب التغييرات. و في طلبة تغيروا بس علشان يتأقلمون مع حياتهم اليديدة. و في البعض مكانك سر مثل راحوا ردوا لا تغيير و لا هم يحزنون بس خذوا الشهادة و ردوا حتى ان احتكاكهم بأهل الديرة قليل و معظم تعاملاتهم تكون مع ناس عرب و قعداتهم تكون مع ناس خليجيين او اهل ديرتهم.

بالنسبة لي انا حطيت في بالي اني رايح لندن بس علشان ادرس و اخذ شهادة و ارجع ديرتي مرة ثانية لان مالي الا ديرتي و مثل ما قالو جديمك نديمك و لو اغناك يديدك. والكل يقول لي في كل عطلة اني ما تغيرت مثل البعض للحين على حطتي . عن نفسي اوافقهم الراي يعني في شوية اعتماد على النفس لان الاوضاع في لندن تفرض علي اني اعتمد على نفسي علشان اصرف اموري لان ما احد راح ايي و يسوي شغلي عني. اكبر دليل اني للحين على حطتي ان في ناس لما راحوا و درسوا في بريطانيا صارت عندهم لكنة اهل الديرة لكني للحين اتكلم انجلينزي عادي من غير اللكنة. حتى اماكن طلعاتي في لندن هي الاماكن التقليدية اللي ممكن تطري على اي واحد مثل نايتس بريج او اكسفورد ستريت و اذا ابي اغير اروح كناري وورف لان المكان هناك اشرح و في شيليز :) و حتى جرايدي و مجلاتي اللي اشتريهم كلها عربية حتى البرامج اللي اتابعها في التلفزيون كلها خليجية و في رمضان كنت اتابع الحلقات و في بعض الحالات اعدل جدولي علشان ما تفوتني الحلقة معني عارف شبيصير يا وحدة بتتطلق او ريلها او بيطقها او ورث بينباق بس فوق جذي ماتوب و اتابع مسلسلاتنا. معني شوي اتابع مسلسلات انجلينزية بس مب ذاك الزود حسب المزاج. و بصراحة عاجبني الوضع جذي

السؤال الموجه و بالذات للي درسوا في الخارج (خارج الوطن العربي) شنهو انطباعكم عن تجربتكم ؟ تغيرتوا 180 درجة او من داخلكم رفضتوا التغيير الجذري و قبلتوا بالتغييرات البسيطة اللي ممكن تحدث لان الظروف فرضت هالتغييرات؟ حبيت اسمع ارائكم

- - - - - - - - - - - - - -

ابارك لبومريوم عودته لعالم المدونات و يا مطول الغيبات جاب الغنايم .... و على قولتهم ولكم باك :)

- - - - - - - - - - - - - -

شي حلو ان ننبذ الطائفية و نتحد كلنا كبحرينيين و نوحد جهودنا لخدمة وطنا اقول هالكلام بعد ما قريت في الجرايد عن زيارة الشيخ علي سلمان لمقر المرشحة الدكتورة منيرة فخرو و تأييده لها ..... ناطر يوم 25-11 و داعي الله سبحانه ان يرزق البحرين بنواب يخدمونها بعيونهم و يبدون البحرين على مصالحهم الشخصية

- - - - - - - - - - - - - -

و مثل ما قلت من قبل باب الاقتراحات بالنسبة للمدونة مفتوح فاللي عنده اي اقتراح حياه و اهلا و سهلا

- - - - - - - - - - - - - -

و السلام عليكم ورحمة الله وبركاته

نساء من بلادي

السلام عليكم و رحمة الله وبركاته

اكتب طبعا هالبوست بمناسبة فوز المرأة البحرينية بالتزكية بمقعد في المجلس النيابي و علشان بعد اعطي مرتادي المدونة نبذة عن بعض الشخصيات النسائية اللي تركت بصمات واضحة كلن في اختصاصها و رفعت اسم البحرين فوق. المرأة مثل الرجل ساهمت في بناء الدولة و بذلت الغالي و النفيس علشان ترفع اسم ديرتها فوق في كافة المحافل و الحمد لله المرأة البحرينية اصبحت مثال يتحذى به و شرفت بلادها وين ما راحت .....اترككم مع بعض الشخصيات اللي اخترتها لكم و اللي عنده معلومات اضافية حياه و اهلا و سهلا.

الشيخة لولوة بنت محمد بن عبدالله ال خليفة:
رائدة العمل النسائي و التطوعي في البحرين منذ خمسينات القرن الماضي. واجهت تحديات المجتمع المحافظ في تلك الفترة و قامت هي و مجموعة من النسوة بتأسيس نادي خاص للبنات بعد موافقة حاكم البحرين و توابعها المغفور له حضرة صاحب السمو سلمان بن حمد ال خليفة. و في سنة 1960 كانت من الاعضاء المؤسسين لجمعية رعاية الطفل و الامومة. و الشيخة لولوة عضوة في العديد من اللجان و الجمعيات التي تعنى بالشأن النسائي مثل لجنة الاحوال الشخصية و اللجنة الوطنية للطفولة. الشيخة لولوة انسانة صبورة و مكافحة خسرت في فترات متقاربة من الزمن ناس عزيزين عليها مثل زوجها و اخوانها المرحوم الشيخ خالد بن محمد وزير العدل الاسبق و المرحوم الشيخ عبدالعزيز بن محمد وزير التربية و التعليم الاسبق و ابنها المرحوم الشيخ خليفة بن سلمان بن محمد وزير العمل و الشؤون الاجتماعية الاسبق و المرحوم الشيخ احمد بن سلمان بن محمد و لكن هالاحداث المؤلمة ما منعتها من ممارسة اعمال الخير و لازالت الى يومنا هذا تعطي و تساهم في اثراء العمل التطوعي في البحرين
المصدر: http://www.womengateway.com

الدكتورة منيرة احمد يوسف فخرو :
استاذ مشارك في جامعة البحرين و عضوة في المجلس الاعلى للمرأة. في سنة 1995 فصلت من وظيفتها بعد توقيعها على العريضة النخبوية اللي قدمت الى سمو الامير الراحل الشيخ عيسى بن سلمان ال خليفة طيب الله ثراه. كانت من الاوائل اللي اكملو دراستهم الى المرحلة الثانوية في الفترة الاستعمارية و تقرر ارسالها مع مجموعة من البنات الى الدراسة في الجامعة الامريكية في بيروت. واصلت دراستها حتى حصلت على شهادة الدكتوراه من جامعة كولمبيا المرموقة. انضمت بعد اكمالها دراستها الى وزارة العمل و الشؤون الاجتماعية و بعدها الى جامعة البحرين. بعد ان تم فصلها من وظيفتها رحلت الى امريكا و كانت استاذ زائر في جامعة كولمبيا و بعدها انتقلت الى جامعة هارفرد المرموقة و ساندت القضية البحرينية و طالبت باصلاحات سياسية اكثر. عادت الى البحرين سنة 2001 و هي الان مترشحة للانتخابات و الله يوفقها لانها بصراحة تستاهل و هي مثال للمرأة البحرينية الواعية و المثقفة..
المصدر: http://mahmood.tv/?p=2394

الشيخة مي بنت محمد ال خليفة:
الوكيلة المساعدة لشؤون الثقافة و التراث الوطني. تركت بصمة واضحة على الساحة الثقافية في البحرين و بالتحديد في محافظة المحرق. اشرفت على العديد من المشاريع الثقافية مثل مركز الشيخ ابراهيم بن محمد ال خليفة اللي اصبح منارة للثقافة و العلم في المحرق . اقيم في هذا المركز العديد من الفعاليات الثقافية مثل الامسيات الشعرية و استضافة مفكرين و كتاب معروفين. بجانب مركز الشيخ ابراهيم ساهمت الشيخة مي في بناء العديد من الصروح الثقافية مثل بيت محمد بن فارس للفنون الشعبية و بيت عبدالله الزايد للصحافة و بيت ابراهيم العريض للشعر و بيت جمشير للثقاقة الفرنكوفونية- اذا مب غلطان- و ساهمت ايضا في اقامة العديد من الفعاليات الثقافية مثل ربيع البحرين الثقافي

المرحومة عزيزة البسام:
رائدة من رائدات العمل النسائي التطوعي في البحرين. نشرت العديد من الابحاث و المقالات عن وضع المرأة في البحرين. و هي كانت من الاعضاء الناشطين في جمعية نهضة فتاة البحرين . فصلت من وظيفتها بعد توقيعها على العريضة النخبوية اللي قدمت الى سمو الامير الراحل الشيخ عيسى بن سلمان ال خليفة طيب الله ثراه و لكنها اصرت على موقفها و لم تسحب توقيعها . توفيت في تسعينات القرن الماضي . الله يرحمها و يسكنها فسيح جناته

المصدر:http://www.womengateway.com

كلمة اخيرة بس ودي اقولها ترا و الله عيب اللي قاعد يصير في بعض من المقرات الانتخابية من تكسير و تخريب للبوسترات احنا عايشين في ديرة متحضرة مب في الجنغل و اللي ما يداني مرشح معين ليصوت له محد قال له صوت له بالقوة

عسى بس هالبوست كان خفيف عليكم؟
و السلام عليكم ورحمة الله وبركاته

سوالف خفيفة

السلام عليكم ورحمة الله وبركاته

ادري ادري كالعادة تأخرت مدونتي مقصر في حقها بس شاسوي هي عدة اسباب اللي تمنعني عن الكتابة (عدال يا نجيب محفوظ زمانك) المهم يعني الكسل على الصيف و على السفر و على الدراسة و الرجعة لي لندن و الاستفرار هناك و وووووووووووو

المهم عاد اليوم قلت اطل عليكم بشوية سويليفات خفيفة و حجي ودي اقوله لكم

اول شي تقبل الله طاعتكم و صيامكم و تعودونه كل سنة و انتو بخير و صحة عافية و عيدكم مبارك مقدما..... ادري ما خليت شي

1. لندن باللي فيها بس ما ودي افارقها معن اقدر السنة الياية انتقل لي مدينة ثانية او حتى اجرب حظي في امريكا بس بصراحة تعودت على المدينة و على نمط الحياة هناك تعودت على المشي في شوارع كينزنغتون و نايتس بريج و اكسفورد ستريت و تعودت على الاندرجروند و على التاخير المتكرر...... بس عيب لندن غلاها الزايد و الله بلادنا بلاد خير عشرة دينار تخم اللي في الجمعية هني عشرة جنيه ما تييب لك شي ..... بس الحمد لله على كل حال

2. و على طاري الاندرجروند اللي صج باط جبدي شلون محطة نوتج هيل جيت تتسكر لجم يوم و اللي يبون يحولون على السنترل لاين لازم يركبون فوق مرة ثانية و ينزلون تحت ليش ..... لان المحطة فاضت يوم طق مطر الاسبوع اللي فات .... شلون ما يبون المحطة تفيض و اسقفها من الجينكو؟

3. مسلسلات هالسنة طبعا كالعادة طق و صراخ و هواش و دموع و صياح ..... ما يشبعون ..... و طبعا لازم في كل مسلسل الولد الصايع اللي ياخذ بنت عمه و يبهدلها و لازم يكون في مدمن مخدرات و ام مطلقة و ريلها ماخذ على راسها وحدة و ثاينة و هي متهاوشة مع اخوانها على ورث ابوها يعني بكل بساطة حوسة ..... بس فوق جذي للحين نجوف هالمسلسلات

4. معني ماحب اتكلم في السياسة بس نداء لاهل البحرين الغيورين على ديرتهم الانتخابات جربت لتغركم هالمقرات الانتخابية و هالعيوش و المجابيس انتخبو اللي بيخدم البحرين و مستعد يبدي مصلحة الديرة على مصالحة الخاصة .... و لتخلون احد الوزراء يتطنز على النواب اللي تختارونهم و يقول ان بعضهم ما يصلحون حتى يكونون نواطير. بكل بساطة فكرو بمستقبل البحرين مع كل التوفيق للمرشحات انشالله نجوف مرشحة في المجلس الياي.

5. اذا ودكم توسعون سدوركم و ترتاحون بعد عناء يوم طويل .... و اذا انتو متضايقين نصيحتي لكم انكم تزورون مدونة ليل الين و بجانب قراية مواضيعه تسمعون الاغنية اللي حاطها megamyth.blogspot.com

6. عجبني موقع محمود.تي في و فكرة البادجات بالفعل احنا في البحرين محاتجين لهالنوع من المبادرات ..... فله الشكر و التقدير عنوان مدونته www.mahmood.tv

7. و اذا عندكم شي تقولونه حياكم

و السلام عليكم ورحمة الله وبركاته :)

مرت سنة :)

ايه تصورو مرت سنة ....... يوم 1-6-2005 تم افتتاح هذا البلوق رسميا و دخلت عالم المدونات بعد ما كنت اتطمش على المدونات و اعلق و انا مجهول الهوية . البداية كانت يوم سكر بومريوم التعليق في مدونته و اضطريت اني افتح هالمدونة علشان اعلق و قلت مرة وحدة اكتب مواضيع خفيفة و مسلية افضفض فيها .

على الرغم من اني مقل في كتاباتي بس الحمد لله استفاديت من هالتجربة تعرفت على ناس الواحد يفتخر بمعرفتهم و تعرفت على افكار يديدة و على اراء مختلفة . فالشكر موصول لكل من جعل هالتجربة لي مفيدة ممتعة في نفس الوقت ما تتصورون شكثر البلوق فادني و خفف علي الاحساس بالوحدة او بالفراغ بالذات في الايام العادية اللي ما عندي شغل .... يعني و انا مهموم و مغموم في كتابة البحوث او الدراسة حق الامتحانات ما عندي الا اللابتوب ابطله و ابتدي ازور المدونات و اقرا مواضيعها و اوسع صدري و اغير جو شوي .... ياما كنت طالع من المحاضرات و انا لايعة جبدي من المحاضرة و من المحاضر فلت اروح المكتبة و ادش الانترنت و اشوف نفسي مرة وحدة اضحك على موضوع بصوت عالي و لا مهتم من اللي قاعد يمي. و في نفس الوقت كانت المدونات بالنسبة لي وسيلة اني اعبر فيها عن رايي بالتعليق على المواضيع و سماع اراء ثانية و مناقشتها بطريقة حضارية بعيد التوتر او التشنج - حلوة التشنج مادري من وين لاقطها :)

انشالله راجع البحرين تبون الصراحة ولهت على المكيفات و على الحر (ادري اقولها الحين بس اول ما اوصل البحرين راح اندم على الكلام اللي توني قلته) ولهت على السياقة و على المشي في الفرجان و المشية من بيتنا لي بيت يدتي ولهت على المحرق و دواعيسها و على شارع اليواعة و على مجمع السيف (ادري في ناس بتقول عني مينون) و اكثر شي ولهت عليه اكل البيت لاعت جبدي من اكل المطاعم في لندن . انشالله هالصيف يكون ممتع بالنسبة (من يلومني احتريه من بداية السنة) خصوصا اني للمرة المليون راح ابتدي برنامج رجيم يديد و الله يسهل انشالله ... و الله يمدني انشالله بالعزوم اللي تخليني اواصل الروحة للنادي . و انشالله فالصيف راح احاول اني انزل مواضيع اكثر في المدونة

و السموحة على القطاعة :)

سؤال: سعلوة صكت مدونتها ؟

و السلام عليكم ورحمة الله وبركاته