تبـــــــــــــــــــــاريك

صار لي تقريبا شهرين ما نشرت شي .. يعني تقدرون تقولون كسل على شوية سفرات و اخرها انشغالي بالدراسة, المهم يا مطول الغيبات جاب الغنايم و انشالله هالبوست يكون خفيف على زوار البلوق
اول شي حبيت ابارك الجميع بمناسبة حلول شهر رمضان اعاده الله علينا بالخير و اليمن و البركات و عسانا من عواده . ما شي احلى من ان الواحد يكون في ديرته في هذا الوقت بالذات.. اللمة و شوفة الاهل و الجو العام في هذا الشهر المبارك ما يتكررون في شهور السنة العادية. اكثر شي ولهان عليه الثريد و اللقيمات. و طبعا ما انسى البرامج اللي رمضان اللي تنعرض بالكيمات التجارية و بالذات المسلسلات لكن الافكار نفسها يا طلاق او ورث متهاوشين عليه و بنية غنية تحب واحد فقير و لكن اهلها يبون يزوجونها حق ولد عمها الخايب و الصراخ و الطق و الصياح :(
حبيت ابارك لمنتخبنا الوطني و اقول له قدها يالاحمر و انشالله نشوفك في المانيا 2006 شدو حيلكم :)
صج الواحد ما يقدر قيمة ديرته الا في بلاد الغربة كل اللي اقدر اقوله عمار يالبحرين. سالفة صغيرة باقولها لكم وا ترك الحكم لكم. كنت رايح اشتري شوية اغراض لاحظو معاي فرق السعر غرشة الماي العادية اقل شي 400 فلس و احنا عندنا في البحرين غرشة الماي تنباع بنص ربية. مثال ثاني كنت رايح اشتري دفتر طلع لي بجنيهين يعني دينار و شوي على دقتر تصورو و الدفتر في رامز ينباع بخمس ربيات. صج لي قال رامز صرخة في وجه الغلاء